Ky panair u organizua me qëllimin për të mbështetur gratë nga komunat Ferizaj, Lipjan, Shtërpcë, Podujevë, Drenas dhe Skenderaj, duke ofruar një platformë për ekspozimin dhe shitjen e produkteve të tyre dhe promovimin e mundësive ekonomike për fuqizimin e tyre.
Hapja e panairit u bë nga koordinatorja e projektit, Laura Cakolli, e cila prezantoi disa nga arritjet më të rëndësishme të projektit dhe ndau me pjesëmarrësit rezultatet kyçe që ky projekt ka arritur deri më tani. Pas saj, Iliriana Gashi, drejtorja ekzekutive e KW4W, theksoi rëndësinë e panairit si një platformë për fuqizimin e grave dhe shprehu falënderimet e saj të sinqerta për institucionet, partnerët dhe të gjithë bashkëpunëtorët që kanë kontribuar në suksesin e këtij projekti. Ajo nënvizoi rëndësinë e bashkëpunimit për të vazhduar mbështetjen ndaj grave dhe për të avancuar përpjekjet për barazi gjinore dhe mundësi ekonomike.
Panairi përfshinte një platformë të veçantë që përmbante dy panele diskutimi të rëndësishme. Paneli i parë u përqendrua në krijimin e mundësive ekonomike për gratë në procesin e riintegrimit, duke theksuar përvojat dhe përpjekjet e institucioneve të ndryshme. Pjesëmarrësit në këtë panel ishin Edi Gusia – Drejtore, Agjencia për Barazi Gjinore; Donjeta Dragusha – Drejtore, Drejtoria për Zhvillim Rural në Prishtinë; Vlora Tuzi Nushi – Specialiste e Programit/Drejtore, UNWomen në Kosovë; dhe Luljeta Demolli – Drejtore, Qendra Kosovare për Studime Gjinore.
Paneli i dytë trajtoi rolin e institucioneve në mbështetjen e grave të mbijetuara nga dhuna me bazë gjinore. Ky diskutim u pasurua nga kontributet e Vjosa Bytyci – Prokurore, Njësiti i Dhunës në Familje; Filloreta Lekiqi – Gjyqtare, Gjykata Themelore në Prishtinë; dhe Deniz Celcima – Psikologe. Të dy panelet u moderuan me mjeshtëri nga Jorida Xhafaj, e cila ndau përvojën dhe ekspertizën e saj të gjerë në këto fusha.
Ky aktivitet u zhvillua në kuadër të projektit “Together Building Resilience” i financuar nga Fondi i Mirëbesimit i OKB-së për t’i dhënë fund dhunës kundër grave (UN Trust Fund). Fondi i Mirëbesimit i OKB-së është i vetmi mekanizëm global për dhënien e granteve, i dedikuar ekskluzivisht për të adresuar të gjitha format e dhunës ndaj grave dhe vajzave në nivel lokal dhe kombëtar. Deri më sot, Fondi i Mirëbesimit i OKB-së ka dhënë 225 milionë dollarë për 670 iniciativa në 140 vende dhe territore.
